J’aime Paris … Ja, det er heilt sant. Eg ELSKAR den franske hovudstaden! Eg har ikkje vore der mange gonger, men no har eg endeleg begynt å få litt teken på byen. Funne ut kor eg likar å vere, og kor eg ikkje synes det er fullt så spanande. No sist var eg der i samband med Maison & Objet, møbelmessa som går av stabelen to gonger i året. Messa var fin, om ikkje heilt nyskapande, men eg fann så absolutt inspirasjon denne gongen òg.
Det som ga meg minst like mykje inspirasjon, var å vandre rundt i Le Marais-området, som eg tidlegare har prøvd å finne utan hell. Men med heilt konkrete gatenamn nedskrive i almanakken, var det ikkje noko problem i det heile (takk, Anja!) – og eg hadde det aldeles strålande. For dei av dykk som er like lite kjent som meg, foreslår eg å ta utgangspunkt i rue des Francs Bourgeois, og arbeide dykk rundt derifrå. Og når du først er der, stikk innom den heilt fantastiske butikken Home Autour du Monde (www.autourdumonde.com). Blir du ikkje forelska der, så veit ikkje eg!
Under følgjer først nokre bilde frå sjølve messa, deretter nokre frå butikken. Bon courage!

Cecilie

Paola Navone jobbar for så å seie «alle» for tida, som til dømes Baxter, Reichenbach og Ivano Redaelli (www.ivanoredaelli.com). For sistnemnde har ho innført folklorestilen.

Hos Baxter (www.baxter.it) hadde ho jobba meir med skinn, dyreformer og -print, og veldig, veldig luksuriøse materialar, i kolleksjonen Black & White. 

Gervasoni (www.gervasoni1882.it) viste ikkje så veldig mykje anna enn det vi såg i Milano i fjor, men fint er det lell!

Missoni (www.missoni.com) er alltid fengande, med nye fargar på sine berømte mønstre.

Vi skimta til og med sjølvaste Rosita Missoni, djupt i ein intervjusamtale. Neste gong er det kanskje vi som kan skilte med det?

Desse lysa har eg lyst på, òg frå Missoni.

Danske Muuto (www.muuto.com) var til stades – sjølvsagt.

Ligne Roset (www.ligne-roset.com) lanserte ny modulsofa – veldig, veldig lekker.

Og så var det butikken. Eg føler bilda talar for seg sjølve!